CU ASSÀ E CU NENTI

Lu scuru veni di sciasattu e mancu bussa,
Lu friddu punci e fa la facci russa
Na pampanedda bianca e amurusa
scinni e s’annaca cumu na carusa
Poi ‘nforza e chiama lesta li so suru
Tanti pampani stiddrianu nnu scuru
Sunnu na neglia, nun si vidi a un passu
Un velu biancu tantu è l’ammassu;
s’arriposanu duci unni su misi
facinnu biancu tuttu lu paisi
la genti a la brascera sta aggiuccata 
intra li casi, stritta e accuttufata
stringinnu scialli, manti e mantillini
vesti di pannu o puru scapuccini
cu po’ consa la tavula cu u pani,
mentri u panaru ci quadia li mani,
vinu, carni, purpetta, e senza prescia
calla e chi fuma mangia na minescia
quarchi autru senza scarpi e senza luci
nun avi forza e mancu jetta vuci
nenti minescia chi fuma e calla calla;
frica li mani e pi lu friddu abballa.
La nivi? nun è la stessa pi tutti i genti,
ca su ammiscati: cu assà e cu nenti, 
È bella si s’avi pani, ligna e cupirtura
Cu nun n’avi pensa a l’estati:
Su migliu li sudura!    

( tiemme)